ཁ་སང་གྲོགས་པོ་ད་རང་འབྲེལ་ཐག་ཆད། །
ད་ལྟ་མཛའ་བོ་སང་ཉིན་དགྲ་རུ་འགྱུར། །
ཅི་བྱེད་གཏད་སོ་བྲལ་བའི་སྲིད་པ་འདི། །
སྡུག་གི་ཚོར་བ་གྲངས་ཀྱི་ག་ལ་ཆོད། །
དགའ་བའི་ཚོར་བ་སྡུག་གི་དོང་དུ་ལྷུང་། །
སྡུག་གི་ཚོར་བ་དགའ་བའི་རྣམ་པར་འགྱུར། །
དགའ་སྡུག་ངེས་མེད་སྒྱུ་མའི་རྨི་ལམ་གྱིས། །
སེམས་འདི་བསླུས་པ་གྲངས་ཀྱི་ག་ལ་ཆོད། །
དམའ་སར་བསྡད་དུས་གོ་ས་འཐོབ་ལ་རེ། །
གོ་ས་བརྙེས་དུས་ངལ་བའི་སུན་སྣང་སྐྱེ། །
མིང་རྐྱང་ཚིག་ལ་བདེ་བའི་རེ་འདུན་གྱིས། །
སེམས་འདི་བསླུས་པ་གྲངས་ཀྱི་ག་ལ་ཆོད། །
དུང་བའི་བརྩེ་བ་འགྱུར་མེད་རྟག་པ་དང་། །
སྡང་བའི་དགྲ་བོ་གདོད་ནས་མ་གྲུབ་ཀྱང་། །
དགྲ་གཉེན་འཛིང་པ་བྱེད་པའི་ཞེ་སྡང་གིས། །
སེམས་འདི་བསླུས་པ་གྲངས་ཀྱི་ག་ལ་ཆོད། །
གྲངས་མེད་ཡུལ་ནས་ད་ལྟར་ཐུག་གི་བར། །
ངེས་མེད་འཁོར་བར་འགྲིམ་པའི་ཤུལ་ལམ་ལ། །
ཤེས་རབ་མིག་གིས་ཕྱིར་བལྟས་བྱས་པའི་ཚེ། །
སྐྱོ་བའི་ཡིད་ཀྱི་མཆི་མ་སེམས་ལ་ལྷུང་། །
གངས་རི་ཀརྨ་སྤྲུལ་སྐུ་ནས།