ཆོས་རྗེ་བྱང་ཆུབ་སེངྒེ་ནི་ཕྱི་ལོ་༡༥༡༠་ལྕགས་རྟ་ལོ་ཟླ་བ་༦་ཚེས་༡་ལ་སྨར་ཁམས་ཁྱུང་འབུམ་ཡུག་པོ་གྲོང་དཔལ་ལེགས་ཚང་གི་ཡབ་བྱམས་པ་རྒྱ་མཚོ་དང་ཡུམ་ཡེ་ཤེས་དབང་མོ་གཉིས་ལས་སྐུ་འཁྲུངས།
དགུང་ལོ་བཅུ་གསུམ་ལ་ཤོ་དགོན་དུ་ཕེབས་ནས་བྱང་ཆུབ་དཔལ་བཟང་སོགས་ལས་རབ་ཏུ་བྱུང་བས་མཚན་བྱང་ཆུབ་སེངྒེ་གསོལ། མཁན་པོ་དང་བཟའ་ར་རྡོ་རྗེ་ལས་མདོ་གཞུང་དང་བཀའ་རྙིང་གི་གསང་ཆོས་མང་པོ་ཐོས་བསམ་སྒོམ་གསུམ་མཛད། བཟའ་ར་རྡོ་རྗེས་རང་གི་བླ་མའི་སྐྱེ་བ་ཡིན་པ་མཁྱེན། དགུང་ལོ་ཉི་ཤུ་ལ་རིན་ཆེན་ཉི་མ། དཀོན་མཆོག་ངག་དབང་སོགས་ལས་བསྙེན་པར་རྫོགས། དགུང་ལོ་སུམ་ཅུ་སོ་གཅིག་ལ་ཀཿཐོག་ལ་ཕེབས་ནས་ཤྰཀྱ་རྒྱལ་མཚན་ལས་སྨར་ཚང་ཕྱག་ཆེན་དང་རྫོགས་ཆེན་གྱི་ཁྲིད་གསན་ནས་སྒོམ་སྒྲུབ་བྱས་པས་ལྟ་བ་ཐུགས་ལ་འཁྲུངས། སླར་ཙོམ་མདོ་གནས་གསར་དགོན་ཕེབས་ནས་ཁྲི་རབས་བཅོ་ལྔ་པའི་ཐུགས་འགན་བཞེས། ཡངས་རི་དགོན་གྱི་རི་ཁྲོད་དུ་སྒོམ་སྒྲུབ་མཛད་པས་གྲུབ་པའི་གོ་འཕང་བརྙེས། ཕྱི་ལོ་༡༥༧༡་ལྕགས་ལུག་ལོ་ཟླ་བ་༨་ཚེས་༡༧་ལ་བདེ་བར་གཤེགས། སློབ་མ་བཀྲ་ཤིས་རྒྱ་མཚོ། སྐལ་བཟང་རྒྱ་མཚོ། ཐུབ་བསྟན་རྒྱ་མཚོ། རིག་འཛིན་སེངྒེ་། འཇམ་དཔལ་སེངྒེ་། ཡོན་ཏན་སེངྒེ་། ཟླ་བ་རྡོ་རྗེ། ཉང་རལ་གོ་ཆ། འབྲོང་བཟང་བ་བཅས་བྱོན།
རྒྱལ་སྤྱི་ཁྲིམས་ལུགས་ལྟར་ལོ་རྒྱུས་འདི་དེབ་སྐྱེལ་བྱས་པའི་བདག་དབང་སྨར་ཚང་བཀའ་བརྒྱུད་རྒྱལ་ཡོངས་ལས་ཁུངས་ལ་ཡོད་པས་ཆོག་མཆན་མེད་པ་གང་འབྱུང་ཕབ་བཤུ་དང་ཡིག་རྐུ་བྱས་ཚེ་ཁྲིམས་ལུགས་ལག་སྟར་བྱ་རྒྱུ་ཡིན།