གསུང་རབ་རིན་པོ་ཆེ་རྣམ་པར་བཀོད་པའི་མཚོན་བྱེད་ཅེས་བྱ་བ།
སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །
བླ་མ་དམ་པ་རྣམས་ཀྱི་རང་བཞིན་ནི། །
བླ་མེད་སངས་རྒྱས་ཐམས་ཅད་གཅིག་བསྡུས་སླད། །
བླ་ན་མེད་པའི་དཔལ་འབྲས་ཀུན་སྩོལ་བའི། །
བླ་མེད་བླ་མའི་ཚོགས་ལ་ཕྱག་འཚལ་ལོ། །
ལྷར་བཅས་འཇིག་རྟེན་སྣང་མཛད་སྒྲོན་མེ་མཆོག །
ལྷ་བརྒྱའི་གཙུག་གི་ནོར་བུས་ཞབས་མཆོད་ཅིང་། །
ལྷ་མིན་སྡེ་དང་བཅས་པ་ཟིལ་གནོན་པ། །
ལྷ་ཡི་ལྷར་གྱུར་ལྷ་མཆོག་སངས་རྒྱས་རྒྱལ། །
ཆོས་གང་ཐོག་མ་བར་དང་མཐར་དགེ་བས། །
ཆོས་མིན་རྡུལ་དང་མུན་པ་རྣམ་བསལ་ནས། །
ཆོས་ཀྱི་སྣང་བས་ཞི་བའི་དཔལ་བསྐྱེད་པ། །
ཆོས་བཟང་ངེས་འབྱིན་ལམ་ལ་ཕྱག་འཚལ་ལོ། །
དགེ་བ་སྤྱད་པའི་རྒྱུ་ལས་ལེགས་བསྐྲུན་ཞིང་། །
དགེ་ལེགས་ལམ་ལ་གཅིག་ཏུ་གཞོལ་གྱུར་པ། །
དགེ་འདུན་རྒྱ་མཚོ་རྒྱ་མཚོའི་སྤྲིན་ཚོགས་ལ། །
དགེ་བ་སྤེལ་སླད་ཕྱག་འཚལ་མཆོད་པར་བགྱི། །
སྐྱེ་འགག་དུ་མ་སྣང་བའི་ཆོས་རྣམས་ཀུན། །
སྐྱེ་འགགས་མེད་པའི་དབྱིངས་སུ་ལེགས་བསྟན་པས། །
སྐྱེ་སོགས་སྲིད་ཞིའི་མཐའ་ལས་རྣམ་གྲོལ་བ། །
སྐྱེ་མེད་རྒྱལ་བའི་ཡུམ་ལ་ཕྱག་འཚལ་ལོ། །
འདི་ལྟར་བསྐལ་པའི་མཆོག་གྱུར་བསྐལ་བཟངས་ཀྱི། །
སྐྱེ་དགུའི་ཚེ་ལོ་བརྒྱ་པའི་དུས་བབས་ཚེ། །
ཤྰཀྱའི་རྒྱལ་པོ་ཆོས་ཀྱི་རྒྱལ་པོར་བྱོན། །
གསུང་རབ་རིན་ཆེན་འགྲོ་ལ་རབ་གསལ་གྱུར། །
དེས་བསྟན་བསྟན་པ་ལྔའི་བརྒྱ་བདུན་པ་ལ། །
འཛམ་བུས་མཚོན་པ་འཛམ་གླིང་བྱང་ཕྱོགས་སུ། །
ཇིང་གིར་གན་ཞེས་རབ་གྲགས་གྲགས་ཆེན་དེས། །
ཧོར་གྱི་རིགས་བྱུང་རིགས་གཞན་ཟིལ་གནོན་པ། ། ཚིག་རྐང་འདི་དཔེ་མཛོད་ཀྱི་ཡིག་རྙིང་ནང་དུ་མེད།
རང་གི་དབང་གིས་ཡུལ་ཀུན་དབང་དུ་བྱས། །
དེ་རྗེས་རྒྱལ་རབས་ལྔ་པའི་རྒྱལ་པོ་མཆོག །
གོ་པེ་ལ་ཞེས་འགྲོ་ལ་རབ་གྲགས་པས། །
རྒྱལ་ཐབས་མཛད་པས་རྒྱལ་སྲིད་སྔ་མ་བས། །
ཆེས་ཆེར་འཕེལ་ཞིང་ཆོས་བཞིན་རྣམ་པར་བསྐྱངས། །
འགྲོ་བ་དཔལ་འབྱོར་གཉིས་ཀྱིས་འབྱོར་པར་འགྱུར། །
ས་བདག་དེ་ནི་བསྟན་ལ་རབ་གུས་ཤིང་། །
ཁྱད་པར་བོད་ཁམས་དག་ལ་ཐུགས་བརྩེ་བས། །
གངས་ཅན་སྐྱོང་བའི་བཀོད་པ་རྒྱ་ཆེར་མཛད། །
བྱེ་བྲག་མདོ་ཁམས་ཟལ་མོ་སྒང་ཞེས་པ། །
ཤར་ནུབ་ལྷོ་བྱང་སྡེ་དང་ཡན་ལག་བཅས། །
ཀུན་ལ་ཕན་ཕྱིར་ཀུན་གྱི་གཙོ་བོར་ནི། །
སྟོན་ཚུལ་ཞེས་བྱ་བ་ལ་དབང་རབ་བསྐུར། །
དེ་ཡི་གྲོགས་དང་ཡུལ་ཁམས་བསྲུང་བའི་ཕྱིར། །
ཡུ་གུར་རིགས་བྱུང་གར་ར་གོ་ཇོ་ཡི། །
མཁར་དུ་སྐྱེས་པ་གན་མི་དུ་ཞེས་བྱ། །
དེ་ཡི་བུ་ནི་དུ་གལ་ག་ཡ་སྟེ། །
དེ་ཡི་ཁྱིམ་ཟླ་དུར་མིས་དེ་རིམ་མོ། །
དེ་དག་གི་བུ་ཡུག་རུན་ག་ཡ་སྟེ། །
དེ་ཡི་ནུ་བོ་ཟེའུ་ག་ཡ་ཡིན། །
ཐ་ཆུང་ཨེ་སེ་ན་ཞེས་བྱ་བ་འདི། །
ལུང་དང་བཀའ་རྟགས་ཕྱག་རྒྱ་དང་བཅས་པ། །ཚིག་རྐང་འདི་དཔེ་མཛོད་ཀྱི་ཡིག་རྙིང་ནང་དུ་མེད།
ཉེ་བར་བསྐོས་ཤིང་བསྐོས་པའི་བྱ་བ་བསྒྲུབས། །
འདི་ཡི་བླ་མ་སྲིད་གསུམ་གསལ་མཛད་པ། །
ཁམས་གསུམ་རྣམ་འདྲེན་ལམ་གསུམ་སྟོན་པ་པོ། །
ས་སྐྱ་པཎྜི་ཏ་ཞེས་གྲགས་པ་ཡིན། །
དེ་ཡི་དྲིན་གྱིས་བསྟན་ལ་རབ་ཞུགས་ནས། །
བསྟན་པས་བསྒྲུབ་བྱ་སངས་རྒྱས་ཐོབ་ཕྱིར་དང་། །
རྒྱལ་པོ་ཡང་སྲས་བཙུན་མོར་བཅས་པ་རྣམས། །
སྐུ་ཚེ་རིང་ཞིང་ཆབ་སྲིད་བརྟན་ཕྱིར་དང་། །
ཕ་མ་སོགས་ཀྱི་དྲིན་ལན་བསགས་ཕྱིོར་དང་། །
རྒྱལ་ཁམས་ཆོས་ཀྱིས་ཤིས་པར་བྱ་བའི་ཕྱིར། །
དུས་གསུམ་རྒྱལ་བ་ཀུན་གྱི་ཡུམ་གྱུར་པ། །
ཤེས་རབ་ཕ་རོལ་ཕྱིན་མ་རྒྱས་འབྲིང་གསུམ། །
ཤིང་ཕོ་ཁྱི་ལོའི་སྟོན་ཟླ་རྣམ་གསུམ་ལ། །
སྨར་ཁམས་ཙོམ་མདོ་གནས་སར་ཞེས་བྱ་བར། །
བཟོ་སྦྱངས་མཁས་པའི་ཚོགས་རྣམས་སྤྱན་དྲངས་ཏེ། །
བེེ་ཌྰརྱ་དང་མཚུངས་པའི་གཞི་རྟེན་ལ། །
གསེར་བཟང་ཞུན་མས་ལེགས་པར་བཞེངས་ནས་ཀྱང་། །
ཞུས་དག་དྲས་དང་གླེགས་ཤིང་གླེགས་ཐག་དང་། །
ན་བཟའི་བར་གྱིས་རིམ་གྲོ་ཚར་བགྱིས་ཤིང་། །
དྲི་མེད་ལུང་གི་ཚུལ་ལས་འབྱུང་བ་བཞིན། །
རབ་ཏུ་གནས་པ་ཡོངས་སུ་རྫོགས་བགྱིས་ཏེ། །
ཁ་ན་མ་ཐོ་མེད་ཅིང་དགེ་བ་ཡི། །
ཡོད་བྱད་ཚོགས་ཀྱིས་བསྙེན་བཀུར་འཐུལ་བ་བགྱིས། །
སླད་ནས་དགེ་བ་སྤེལ་ཞིང་རྒྱུན་བསྲིང་ཕྱིར། །
ཆོས་འདི་ལེགས་པར་གསན་ཞིང་ཐུགས་ཆུད་པས། །
བསོད་ནམས་ཞིང་གི་མཆོད་པ་ཕུལ་ནས་ཀྱང་། །
ཀློག་དང་ཁ་ཏོན་མཆོད་པ་རྒྱས་བགྱིད་པའི། །
བཀོད་པ་བགྱིས་པའི་དགེ་བ་རྒྱ་ཆེན་དང་། །
གཞན་ཡང་ཕྱོགས་བཅུའི་དུས་གསུམ་དགེ་བ་ཀུན། །
ལྷག་བསམ་དག་པས་གཅིག་ཏུ་བསྡོམས་བགྱིས་ནས། །
བདག་དང་མཁའ་མཉམ་སེམས་ཅན་ཐམས་ཅད་ཀྱིས། །
རྫོགས་པའི་བྱང་ཆུབ་དམ་པ་ཐོབ་པར་ཤོག །
གནས་སྐབས་ས་བདག་ཡབ་སྲས་སྐུ་ཚེ་རིང་། །
རྒྱལ་ཁམས་ཆོས་དང་ལྡན་ཞིང་བདེ་ལེགས་ཤོག །
བདག་ཀྱང་ཚེ་རིང་ནད་མེད་བར་ཆད་ཞི། །
བསམ་པ་ཐམས་ཅད་ཆོས་བཞིན་འགྲུབ་པ་དང་། །
མི་ཕམ་རྒྱལ་པོ་མངོན་པར་བྱང་ཆུབ་ཚེ། །
དེ་ཡིས་བྱང་ཆུབ་དམ་པ་ལུང་སྟོན་ཤོག །
དེ་ལྟའི་དོན་སྟོན་བྱེད་པའི་ཚིག་སྦྱོར་འདི། །
ཤིང་མོ་ཕག་ལོ་བྱ་སྤོའི་ཟླ་བ་ཡི། །
བཅོ་ལྔའི་ཉིན་པར་ཙོམ་མདོ་གནས་སར་རུ། །
ལེགས་པར་བྲིས་པ་ཀུན་ཏུ་བདེ་ལེགས་ཤོག །
འཕྲིན་ཡིག་འདི་འགྲོ་མགོན་ཆོས་རྒྱལ་འཕགས་པ་བློ་གྲོས་རྒྱལ་མཚན་མཆོག་ཆེས་མཐའ་མར་བོད་དབུས་སུ་བྱོན་དུས་སྨར་ཁམས་རི་ཤོད་ཀྱི་ཕྱོགས་སུ་སྨར་ཚང་བཀའ་བརྒྱུད་ཀྱི་གདན་ས་ཤོ་ཙོམ་ཉི་ཟླ་ཟུང་གཅིག་ཏུ་གྲགས་པའི་ཙོམ་མདོ་གཙུག་ལག་ཁང་དུ་ཕེབས་པའི་ལོ་རྒྱུས་ཀྱི་བདེན་དཔང་ཞིག་ཡིན།
འདི་སྨར་ཚང་བཀའ་བརྒྱུད་རྒྱལ་ཡོངས་ཚོགས་པར་མ་འདྲི་བར་གང་འབྱུང་ཕབ་བཤུ་མི་ཆོག །