ཕྱི་ལོ་༢༠༠༩་ཟླ་༡༢་ཚེས་༢༩་ཉིན་སྨར་ཚང་བཀའ་བརྒྱུད་དབུ་བརྙེས་ནས་མི་ལོ་༨༤༢་དང་ཉམས་རྒུང་སོང་ནས་ལོ་ངོ་༣༧༠་འཁོར་བའི་དུས་དྲན་སྲུང་བརྩིའི་མཛད་སྒོར་དབྱིན་ལེན་དུ་སྨར་ཚང་བཀའ་བརྒྱུད་སྲི་ཞུ་ཚོགས་པ་ནས་གནང་གཏན་འཁེལ་འདུག་པར་དགའ་སྤྲོ་བརྟས།
སྤྱི་ནོར་༧་གོང་ས་༧་སྐྱབས་མགོན་ཆེན་པོ་མཆོག་གི་བཀའ་དགོངས་བཞིན་སྨར་ཚང་བཀའ་བརྒྱུད་སྲིད་ཞུ་ཚོགས་པ་ནས་ད་བར་ལྷག་བློ་ཆེ་བསྐྱེད་ཀྱིས་བོད་མིའི་ཐུན་མོང་མ་ཡིན་པའི་ཆོས་རིགས་སྲུང་སྐྱོབ་དང་། ལྷག་དོན་སྨར་ཚང་བཀའ་བརྒྱུད་ཀྱི་ཕྱག་དཔེ་དཀོན་རིགས་ཁག་དཔར་སྐྲུན་འགྲེམས་སྤེལ། བླ་བརྒྱུད་རྙེད་པ་རྣམས་ཀྱི་སྐུ་ཐང་བྲིས་བཀོད་བཅས་ཆོས་བརྒྱུད་ཀྱི་མེ་རོ་སླར་གསོ་གནང་བཞིན་པར་བསྔགས་བརྗོད་དང་རྗེས་སུ་ཡི་རང་ཞུ་རྒྱུ་ཡིན།
བོད་མིའི་ཐུན་མོང་མ་ཡིན་པའི་ལེགས་བྱང་དང་ཆབ་སྲིད་ཀྱི་གནས་བབ་ཧ་ཅང་ཛ་དྲག་གཉན་འཕྲང་ཅན་གྱི་དུས་སྐབས་འདིར་སྨར་ཚང་བཀའ་བརྒྱུད་སྲི་ཞུ་ཚོགས་པ་ནས་ངལ་བ་ཁྱད་བསད་ཀྱིས་ཁུལ་དེར་གནས་འཁོར་རང་རིགས་མང་ཚོགས་དང་དབྱིན་ལེན་མི་རིགས་སོགས་ལ་ནང་ཆོས་ངོ་སྤྲོད་གནང་རྒྱུ་སོགས་ཀྱིས་མཚོན་ཆོས་སྲིད་ཀྱི་ཕྱག་ལས་རྣམ་མང་སྤེལ་མུ་ཡིན་འདུག་པ་ནི་བོད་མིའི་ལར་ཞེན་དང་རང་འཁྲེལ་ལས་འགན་འབད་སྒྲུབ་སྤོབས་པ་བྱ་འོས་ཤིག་ཡིན། འབྱུང་འགྱུར་ཡང་རྒྱལ་བསྟན་ཆབ་སྲིད་དང་། སྐྱེ་འགྲོའི་བདེ་ཐབས་ལ་སྨན་པའི་མཛད་བཟང་སྔར་ལྷག་གོང་མཐོར་སྐྱོང་གནང་ཡོང་བའི་རེ་སྐུལ་དང་། ད་ལམ་དུས་ཚིགས་ཁྱད་པར་ཅན་འདི་ཐོག་གངས་རི་ཀརྨ་མཆོག་སྤྲུལ་རིན་པོ་ཆེ་མཆོག་དང་ལས་ཀྱི་སྣེ་མོར་གཏོགས་པ་ཚང་མར་བཀྲ་ཤིས་བདེ་ལེགས་དང་མཛད་སྒོ་ལམ་ལྷོང་ཡོང་བའི་སྨོན་འདུན་བཟང་པོ་ཞུ་རྒྱུ་བཅས་རྡ་ས་ནས་བཀའ་ཁྲི་ཟམ་གདོང་པས་༢༠༠༩་ཕྱི་ཟླ་༡༡་ཚེས་༣༠་ལ་ཕུལ། ། ། །