བསྔགས་འོས་ལ་བསྔགས་པའི་རབ་བྱེད་བཞུགས།

བསྔགས་པ་འོས་པའི་རབ་ཏུ་བྱེད་པ་ཞེས་བྱ་བ། །

བླ་མ་དཀོན་མཆོག་གསུམ་ལ་ཕྱག་འཚལ་ལོ། །

དཔལ་ཀུན་གྱི་ནི་འབྱུང་གནས་ཏེ། །

སྲིད་པ་གསུམ་གྱི་སྐྱབས་གཅིག་པུ། །

ཆེ་བའི་ཆེ་བས་གུས་བཏུད་པ། །

སངས་རྒྱས་དཔལ་གྱི་ཡུལ་ལ་འདུད། །

རྒྱལ་པོ་ཁྱོད་ཀྱིས་སྔོན་སྤྱད་པའི། །

དགེ་ཚོགས་རྒྱ་མཚོ་ལས་གྲུབ་པའི། །

དཔལ་འདི་ཕྱོགས་མཐར་གཏུགས་པ་ཡི། །

འགྲོ་ལ་སླར་ཡང་བརྟན་གྱུར་ཅིག །

ཁྱོད་ཀྱིས་རྒྱལ་སྲིད་རྒྱུ་དང་ནི། །

དཀའ་ཚེགས་ཆེན་པོས་མ་བཞེས་ཀྱང་། །

ཉིད་ཀྱི་དཔལ་དང་བདེན་པའི་མཐུས། །

ཅི་བདེར་དབང་བགྱིས་ངོ་མཚར་ལགས། །

ཁྱོད་ཀྱི་མཆེད་སོགས་རྒྱལ་རྒྱུད་གཞན། །

གཞན་གྱིས་བསླུས་ནས་ལོ་གཞུགས་རྣམས། །

ཕྱོགས་བསླད་གྱུར་བཞིན་ཉིད་ལྷགས་ཏེ། །

ཁྱོད་ཞབས་བཏུད་པ་ཡ་མཚན་ལགས། །

སྔར་རབས་རྒྱལ་པོ་མང་ཞིག་གིས། །

རང་གི་སྐུར་བཅས་སྡེ་ཆེན་གྱི། །

ཚོགས་ཀྱིས་གདུལ་བྱར་མ་སྤྱོད་པའི། །

རྒྱལ་པོ་བཅས་པའི་རྒྱལ་སྲིད་བཞན། །

ཤིན་ཏུ་རྩོལ་བའང་མི་མངའ་བཞིན། །

རང་དབང་ཉིད་དུ་དབང་མཛད་དེ། །

དེ་ཡི་འབྱོར་བས་ཀུན་འབྱོར་དུ། །

མཛད་ནས་དེ་དག་བདེ་ལ་སླར། །

བཀོད་འདི་སྡོན་ཆད་ས་སྟེང་འདི། །

བྱུང་བ་སུས་ཀྱང་མ་འཚལ་བའི། །

སྙན་བས་ས་གསུམ་རབ་ཁྱབ་པས། །

རང་སྲིད་སྙེམས་པའི་དཔལ་འཕེལ་ཞིང། །

ཕྱོགས་གཞན་དྲི་བཞིན་ཡིད་གཡོ་བར། །

གྱུར་འདི་ཁྱོད་ཉིད་གཅིག་པུའི་དཔལ།  །

དོ་ཟླ་རྣམས་བར་དབེན་པ་ལགས། །

དཔལ་འབྱོར་འདི་འདྲ་མཐོང་བའི་མིག །

ཀུན་ནས་ཟ་ཟིར་གྱུར་པ་ནི། །

སྣ་ཚོགས་སྒྱུ་མའི་ཆོ་འཕྲུལ་གྱིས། །

རྣམ་པར་བསླད་པའི་མིག་འདྲ་མཆིས། །

འདི་འདྲ་ཐོས་པའི་ཉན་ཤེས་ཀྱིས། །

ཡིད་དབང་རྣམ་པར་བསྐྱོད་པ་ནི། །

སྐམ་པས་གདུང་བ་རྣམས་ཀྱི་ཡིད། །

རླུང་ཆེན་སྒྲ་ཡིས་བསྐུལ་འདྲ་མཆིས། །

ཁྱོད་ཀྱི་དཔལ་གྱིས་རྒྱལ་སྲིད་དག །

སོ་སོར་བརྟན་པའང་འདྲེས་གྱུར་པ། །

འཁོར་ལོས་སྒྱུར་བའི་དཔལ་རྒྱལ་གྱིས། །

གླིང་བཞི་གཅིག་ཏུ་འདྲེས་འདྲེས་མཆིས། །

འདྲི་འདྲ་གནས་རིག་གོང་མ་ཡི། །

ལྷ་རྣམས་དག་གིས་མཐོང་གྱུར་པས། །

སྙིགས་མའི་དུས་ལ་དེ་དག་ཡིད། །

ཀུན་ནས་སོམ་ཉིར་གྱུར་ལགས་གྲང་། །

འདི་འདྲའི་དཔལ་འབྲས་སྨིན་གྱུར་པས། །

ཁྱོད་ཀྱི་བདེ་འགྲོ་བརྙེས་བགྱི་བའི། །

ཕུན་སུམ་ཚོགས་པས་ཕུན་ཚོགས་སླད། །

སྨོན་པར་བགྱི་གཞན་མ་མཆིས་སོ། །

དེ་སླད་སྐྱེ་དགུ་ཐམས་ཅད་ཀྱིས། །

དཔལ་འབྱོར་འདི་འདྲས་འབྱོར་གྱུར་པའི། །

ས་བདག་སྔོན་ཆད་མ་བྱུང་ཞིང་། །

འདི་ཡིས་ཉིད་སྲས་བཞིན་བསྐྱངས་པའི། །

འབངས་ཀྱང་སྔོན་ཆད་མ་བྱུང་ཞེས། །

ཕན་ཚུན་དགའ་བས་ཞལ་ཡི་སྒྲ། །

ཉེ་བར་སྒྲོགས་པའི་སིལ་སྙན་སྒྲས། །

ཁྱེད་ཀྱི་ཐུགས་ཀྱང་དགྱིས་འགྱུར་ཞིང་། །

སྐྱེ་དགུའི་དགའ་བར་མཛད་དུ་གསོལ། །

ཁྲིམས་ཀྱི་རྨོས་ཀྱིས་སྲིད་འབངས་ཀྱི། །

ཞིང་ས་དུལ་བར་བགྱིས་པ་ལས། །

ཆོས་ཀྱིས་ས་བོན་བཏབ་བགྱིས་ཏེ། །

ཟང་ཟིང་ཆུ་ལུད་ཉེར་བྲན་བས། །

བདེ་འགྲོ་འབྱོར་བའི་མྱུ་གུ་དང་། །

རྣམ་གྲོལ་ལོ་ཏོག་སྨིན་པ་ལ། །

བདག་གཞན་དགྱིས་དགུར་སྤྱོད་པར་མཛོད། །

གང་གི་བསོད་ནམས་གསེར་གྱི་གཞིར། །

དཔལ་འབྱོར་ཆུ་གཏེར་ཉེར་འཁྱིལ་བ། །

བདག་གཞན་ཀུན་གྱི་དུས་ཀུན་དུ། །

ལྷུག་པར་གང་སྤྱོད་དེ་རྨད་དོ། །

གཙུག་ལག་དུ་མའི་དོན་ལ་ཐུགས། །

ཀུན་ནས་གསལ་བར་གྱུར་ཁྱོད་ཀྱིས། །

མ་དཔྱད་པ་ཡི་དངོས་པོ་དང་། །

མི་མཁྱེན་པ་ཡི་ཆོས་མ་མཆིས། །

དེ་སླད་ཁྱོད་ཀྱིས་མཁྱེན་པ་ཡི། །

སླད་དུ་ཚིག་འདི་མ་སྨོས་ཀྱང་། །

སྙན་གྲགས་ཐོས་བས་བདག་གི་ཡིད། །

སྤྲོ་བའི་སླད་དུ་སྨོས་པ་ལགས། །

པད་རྒྱས་དྲི་བསུང་བསེར་བུ་ཡིས། །

བསྐྱོད་པས་རིང་གནས་ཉམ་ཆུང་གིས། །

བུང་བས་ཚོར་ཚེ་སྟོབས་མེད་ཀྱང། །

དར་དིར་སྒྲ་སྙན་སྒྲོགས་པ་བཞིན། །

དེ་ལྟར་བསྔགས་བགྱི་འོས་ཁྱོད་ལ། །

བདག་གིས་བསྔགས་པས་ཉེར་བསྐུལ་ནས། །

ཕྱོགས་བཅུའི་རྒྱལ་བ་ཐམས་ཅད་ཀྱིས། །

བསྔགསཤིང་ཤིས་པ་གསུང་གྱུར་ཅིག །

ཁྱོད་སྐུ་ལྷུན་པོ་ལྟ་བུར་བརྟན། །

དཔལ་འབྱོར་རྒྱ་མཚོ་ཆེ་ལྟར་འཁྱིལ། །

འདོད་དགུའི་རིན་ཆེན་རྣམ་མང་གིས། །

སྐྱེ་དགུ་རྟག་ཏུ་ཚིམ་བྱེད་ཤོག །

ཧོར་གྱི་རྒྱལ་རབས་ལྔ་པ་རྒྱལ་པོ་ཆེན་པོ་གོ་པེ་ལ་ཞེས་བྱ་བའི་བསོད་ནམས་ཀྱི་དཔལ་གྱིས། རྒྱལ་ཁམས་ཐམས་ཅད་གཅིག་ཏུ་བཟླུམ་ཞིང་། ཁྱར་པར་དུ་ཡུད་རིང་བོ་ནས། རྒྱལ་རབས་བར་མ་ཆད་པར་རྒྱལ་སྲིད་བརྟན་པར་གནས་པ། མན་ཙེར་ཞེས་བྱ་བའི་རྒྱལ་ཁམས་རབ་ཏུ་ཡངས་པ་ཐ་གྲུ་དང་བཅས་པར་བལྟས་ཏེ། མིའི་དབང་པོའི་ཞབས་ཀྱི་པདྨོའི་ལ་གཏུགས་ནས། དཔལ་འབྱོར་གྱི་གཟིས་རྒྱས་མཚོའི་མཐས་གཏུགས་པའི་སའི་འཁོར་ཐམས་ཅད་ཁྱད་པར་མཛད་པ་ལ་བསྔགས་པའི་རབ་ཏུ་བྱེད་པ་ཞེས་བྱ་བ་འདི་དགེ་སློང་འཕགས་པས་ཤིང་མོ་ཕག་གི་ལོ་སྟོན་ཟླ་འབྲིང་པོིའི་ཚེས་ཉི་ཤུ་གཉིས་ཀྱི་ཉིན་པར་སྒར་མ་རྒྱལ་ལ་བབ་པའི་ཚེ་སྨར་ཁམས་ཀྱི་སའི་ཆ་ཙོམ་མདོ་གནས་གསར་ཞེས་བྱ་བར་སྦྱར་བའོ། །ཞེས་སྤྲིང་ཡིག་འདི་གཉིས་འགྲོ་མགོན་ཆོས་རྒྱལ་འཕགས་པ་རྒྱ་ཧོར་ཡུལ་ནས་ཆེས་མཐའ་མར་དབུས་སུ་ཕེབས་དུས་འབའ་ཐང་རྒྱུན་སྨར་ཁམས་སུ་ཆེས་སྙན་གྲགས་ཆེ་བའི་སྨར་ཚང་བཀའ་བརྒྱུད་ཀྱི་གདན་ས་གཉིས་པ་ཙོམ་མདོ་དགོན་དུ་ཕེབས་པའི་ལོ་རྒྱུས་ཀྱི་རྡོ་རི་བསྲུང་པ་དཀའ་བའི་དཔང་རྟགས་ཚད་མ་ཅིག་ཡིན།   །

                                                 འདི་བཀོད་པའི་ཡིག་ཕྲེང་རྣམས་སྨར་ཚང་བཀའ་བརྒྱུད་རྒྱལ་ཡོངས་ཚོགས་པ་ལ་ཡོད་པས་གང་འབྱུང་ཕབ་བཤུ་མི་ཆོག །