སྨར་ཁམས་ཀྱི་ཆས་གོས་ནི། ཕྱུ་པ། ཐེར་མ། ཤུ་ཕྲུག སྣམ་བུ། གྲུང་རྩེ། འབུ་རས། གཡི་ལྤགས། ཝ་ལྤགས། ཚ་རུ་བཅས་གྱོན་སྲོལ་ཡོད། བུད་མེད་རྣམས་ཀྱི་མགོ་ལ་ཚ་རུ་ལ་མགོ་སྣམ་རྒྱན་པ་དང་། གཡུ་དང་། བྱུ་རུ་སོགས་ཀྱི་མགོ་རྒྱན་སྤྲས་པ། དངུལ་གྱི་སྐུད་པ་སྤྲས་པའི་དར་ཕོད། ཆབ་མ། གློ་ཁུག ཁབ་ཤུབ། གྲི་ཆུང་། གསེར་དངུལ་ཁྲ་རྒྱན་གྱི་གའུ། རྣ་རྒྱན། གཟི་དང་བྱུ་རུ་སྤེལ་མའི་རྐེ་ཐག ཝ་ཞྭ། ལྷམ་ཤུལ་རྩེ་བཅས་གྱོན་སྲོལ་དར། ལག་རྩལ། ལྷ་བྲིས། འཇིམ་བཟོ། སྨན་པ། རྩིས་པ། གསེར་བཟོ། དངུལ་བཟོ། ལྕགས་བཟོ། ཤིང་བཟོང་། རྡོ་བརྐོས། བལ་སྤུ་འཁེལ་འཐག འཚེམ་བཟོ། ཀོ་མཉེད་ལྤགས་གཉེད། ལྷ་རྟེན་མཆོད་ཆས། རྒྱན་གོས་སོགས་སྒྱུ་རྩལ་ལྡན་པའི་རིགས་ཡོད།
སྨར་ཁམས་ཀྱི་སྡེ་དཔོན་ངོ་སྤྲོད། སོག་དམག་བོད་ལ་ཐེངས་གཉིས་གསུམ་དྲངས་པའི་རྒྱུད་རིམ་ནང་སྨར་ཁམས་སུ་སོག་དམག་གིས་འོག་ཚུད་པའི་དཔོན་ལ་སོག་སྡེ་དཔོན་འགོ་ཟེར་བར་གྲགས། སྨར་ཁམས་པའི་ཡུལ་དགོན་ཐམས་ཅད་སོག་དམག་གིས་མིང་བཏགས་པའི་དཔོན་ཁོངས་སུ་འདུས་ཐུབ་ཀྱི་མེད། དཔེར་ན། ས་ངན་གྱི་རྫོང་ཁག་རྣམས་དང་། དངུལ་མཁར་སྡེ་བ། སྟག་ར་སྡེ་བ། རྒྱས་ཚོགས་སྡེ་བ། རྒྱལ་བཀག་སྡེ་ཁག་ཕྱེ་གསུམ། འབུམ་པ་སྡེ་བ། ཞིང་དྲུང་སྡེ་བ། ཚྭ་མཁར་སྡེ་བ་སོགས་ལུང་ཚན་སོ་སོས་དཔོན་པོ་བཟུང་བ་ལས་སོག་པོའི་འོག་ཏུ་འདུས་མེད།
སྨར་ཁམས་ཀྱི་མིང་ནི་ཕྱི་སྣོད་གྱི་ཐོན་ཁུངས་གསེར་དངུལ་ཟངས་ལྕགས། རྩི་ཤིང་ནག་ཚལ། འབྲུ་རིགས་ཤིང་ཏོག་སོགས་སྐྱེས་དངོས་སྨར་རྐྱང་གི་ཕྱུག་པས་སྨར་ཟེར་བ་དང་། ནང་བཅུད་རྟ་ནོར་ལུག་གསུམ། གཅན་གཟན་འདབ་ཆགས། མཁས་པ་དང་གྲུབ་ཐོབ་ཀྱི་ཡོན་ཏན་ཕྱུག་པའི་རིན་པོ་ཆེན་མང་པོ་བྱོན་པས་སྨར་ཟེར། ཁམས་ནི་སྒང་དྲུག་གི་ནང་གསེས་ཀྱི་ཁམས་ཤིག་ཡིན་པས་སྨར་ཁམས་ཞེས་ཐ་སྙད་ཐོག་ཅིང། གླིང་གི་དུས་སུ་སྨར་ཁམས་གླིང་ཡུལ་ཁྲ་མོ་ཞེས་བོས་སྲོལ་ཡོད། སྨར་ཁམས་ཞེས་པའི་ཐ་སྙད་དུས་རབས་ག་དུས་ནས་ཐོག་པ་ངེས་གཏན་དཀའ་ཡང་། ཁྲི་སྲུང་ལྡེའུ་བཙན་གྱི་དུས་སུ་ཡིག་རྙིང་དག་ལས་སྨར་ཁམས་ཞེས་བོས་པར་གསལ། སྔར་འབྲི་ཆུ་དང་ཟླ་བ་ཆུ་གཉིས་ཀྱི་བར་དུ་ཆགས་པའི་སྨར་ཁམས་སྒང་གི་ཁོངས་སུ་གཏོགས་པ་ཐམས་ཅད་སྨར་ཁམས་ཀྱི་ཁྱབ་ཁོངས་ཡིན།