སྨར་ཚང་བཀའ་བརྒྱུད་ཀྱིས་དབྱིན་ཇི་དང་ཐེ་ཝན་ལ་ལོ་རྟག་ཆོས་ཕྱོགས་ཀྱི་བྱེད་སྒོ་གཏན་ཁེལ་བའི་རིགས་རྣམས་བཤམ་དུ་ངོ་སྤྲོད་མདོར་བསྡུས་ཞུ་ཡོད་པས་གཟིགས་རོགས། གལ་ཏེ་དོག་འདྲི་དགོས་ངེས་མཐོང་ཚེ་ཁ་བྱང་ཐོག་འབྲེལ་གཏུགས་གནང་རོགས། །
Read more ...སྨར་ཚང་བཀའ་བརྒྱུད་ཀྱིས་དབྱིན་ཇི་དང་ཐེ་ཝན་ལ་ལོ་རྟག་ཆོས་ཕྱོགས་ཀྱི་བྱེད་སྒོ་གཏན་ཁེལ་བའི་རིགས་རྣམས་བཤམ་དུ་ངོ་སྤྲོད་མདོར་བསྡུས་ཞུ་ཡོད་པས་གཟིགས་རོགས། གལ་ཏེ་དོག་འདྲི་དགོས་ངེས་མཐོང་ཚེ་ཁ་བྱང་ཐོག་འབྲེལ་གཏུགས་གནང་རོགས། །
Read more ...
ཆོས་ལུགས་ཀྱི་ཐོབ་ཐང་འདྲ་མཉམ་ལོངས་སྤྱོད་པའི་དབྱིན་ཇིའི་རྒྱལ་ཁབ་འདི་ལ། ཡེ་ཤུ་དང་། ཧེ་ཏུང་། ཁ་ཆེ། ནང་པ་སོགས་གཞུང་འབྲེལ་དེབ་སྐྱེལ་བྱས་པའི་ཆོས་ཚོགས་༤༩༨༨༡ ཡོད་ཅིང་། རྒྱལ་ས་ལོན་གྲོན་ལ་ཆོས་ཚོགས་༢༢༠༠ ཡོད་པ་རེད། དབྱིན་ཇིའི་རྒྱལ་་པོ་ King Charles ཕྱྭ་ལི་སི་ཡིས་བཙུགས་པའི་the Faith &Belief Forum ཞེས་པའི་ལུགས་ཀྱི་གཟེངས་རྟགས་ཚོགས་པ་འདིས། ཕྱི་ལོ་༢༠༢༣ ལོ་ཟླ་བ་༡༡ ཚེས་༢༡ ལ་གཟེངས་རྟགས་ཐེངས་བདུན་པ་འདི་ཆོས་ཚོགས་༣༢ འདེམ་སྒྲུག་བྱས་པ་ནང་ལ། སྨར་ཚང་བཀའ་བརྒྱུད་རྟག་བརྟན་ཕུན་ཚོགས་གླིང་ཡང་འདེམ་སྒྲུག་བྱས་ཡོད་གསུངས་སོང། གཟེངས་རྟགས་འདི་ཆོས་ལུགས་སོ་སོའི་ལྟ་གྲུབ་དང་། རིགས་གཞུང་། གོམས་སྲོལ་སོགས་ཐབས་སྣ་ཚོགས་ལ་བརྟེན་ནས་ཡུལ་འདི་མི་རྣམས་ལ་ཕན་པའི་ལས་དོན་གྱི་གྲུབ་འབྲས་གཟེངས་སུ་ཐོན་པའི་དཔང་རྟགས་ཕུལ་བ་ཡིན་ཞེས་འགྲེལ་བརྗོད་གནང་། སྨར་ཚང་བཀའ་བརྒྱུད་ལ་གཟེངས་རྟགས་ཕུལ་བ་འདི་མདོར་བསྡུས་ན་གཉིས་སུ་ངེས་ཡོད། དང་པོ་ནི། ཡུལ་འདིར་ནང་པ་སངས་རྒྱས་པའི་ཆོས་ཀྱི་སྲོལ་བརྒྱུད་རྙིང་མའི་ཐབས་ལམ་ལ་བརྟེན་ནས་ལོ་བཅུ་ཕྲག་གཅིག་ལྷག་གི་རིང་ལ། སྡེ་ཚན་རེ་ལ་ལོ་གསུམ་དང་ཕྱེད་ཀའི་སློབ་ཚན་མཐར་ཕྱིན་པ་ཁྲིད་ནས་གྲུབ་དོན་ལག་འཁྱེར་སྤྲོད་ཅིང། ཉམས་ལེན་གྱི་རིམ་པ་ཡང་སྲོལ་བརྒྱུད་ལྟར་ཁྲིད་པ་འདི་གཞན་ལས་ཁྱད་པར་འཕགས་པ་ངོས་འཛིན་ཞུས་ནས་གཟེངས་རྟགས་ཕུལ་བ་ཡིན་ཞེས་གསུངས། གཉིས་པ་ནི། གཏོག་དབྱིབས་ནད་དུག་གི་སྐབས་སུ་སློབ་རྒན་ཚོས་ཆོས་ལུགས་རིས་མེད་ཀྱི་མི་རྣམས་སེམས་ཁམས་ཞི་བ་ལ་གནས་པའི་ཕྱིར་ཏུ། དྲན་པ་དབྱུག་ལ་གཏད་པ། དྲན་པ་ལུས་ལ་གཏད་པ། དྲན་པ་ཚོར་བ་ལ་གཏད་པའི་ཐབས་ལམ་ལ་བརྟེན་ནས་ལོ་གཉིས་ཀྱི་རིང་སྒོམ་ཁྲིད་རྒྱུན་སྐྱོང་བས་མི་མང་པོ་ཞིག་གི་སེམས་ཁམས་ལྷོད་དུ་འབབ་པ། སྐྱོ་སྣང་བསང་བ། འཇིགས་སྣང་ཞི་བ་སོགས་གྲུབ་འབྲས་ཆེན་པོ་ཐོན་པ་ངོས་འཛིན་ཞུས་ནས་གཟེངས་རྟགས་ཕུལ་བ་ཡིན་ཞེས་འགྲེལ་བརྗོད་གནང་སོང། དེ་རིང་གཟེངས་རྟགས་ཐོབ་པའི་ཆོས་ཚོགས་༣༢ ནང་ནས་སྐྱར་དུ་ཆོས་ཚོགས་༨ འདེམ་སྒྲུག་བྱས་ནས་ཚེས་༢༢ ལ་དམིགས་གསར་གྱི་བཅར་འདྲི་ཞུ་རྒྱུ་ཡིན་ཞེས་བརྡ་འཕྲིན་འབྱོར་སོང་བས། ང་ཚོའི་སློབ་མ་ཞིག་གིས་བཅར་དྲི་ལེན་འདེབས་བྱས་པ་རྣམས་ཚོགས་པ་དེའི་དྲ་ལམ་དུ་རིམ་བཞིན་འགོད་རྒྱུ་ཡིན་གསུངས། འདི་ནི་སྨར་ཚང་བསྟན་པའི་བདག་པོ་༧ འགྲོ་མགོན་གངས་རི་ཀརྨ་རིན་པོ་ཆེས་ཕྱི་ལོ་༢༠༠༨ ལོ་ལོན་གྲོན་ལ་སྨར་ཚང་བཀའ་བརྒྱུད་རྟག་བརྟན་ཕུན་ཚོགས་གླིང་ཕྱག་བཏབ་པ་ནས་བཟུང་ལོ་ངོ་བཅུ་ཕྲག་གཅིག་ལྷག་གི་རིང་ཉིན་མཚན་དབྱེར་མེད་འབད་བརྩོན་བྱས་པ་དང་། སྲི་ཞུ་ལས་བྱེད་ཚོས་ཀྱང་ལྷག་བསམ་བཟང་པོ་ཀུན་ནས་སླངས་ནས་འགྲོ་སོང་ཆེ་ཆུང་ཐམས་ཅད་སོ་སོའི་བཏང་ནས་འབད་བརྩོན་བྱས་པའིི་གྲུབ་འབྲས་གཟེངས་སུ་ཐོན་པའི་དཔང་རྟགས་གནང་བ་ལ་བརྟེན་ནས། སྲི་ཞུ་བ་རྣམས་སླར་ཡང་སེམས་ཤུགས་དང་སྙིང་སྟོབས་བསྐྱེད་པ་ལ་ཕན་ཐོག་ཆེན་པོ་བྱུང་སོང་བས། སྨར་ཚང་རྟག་བརྟན་ཕུན་ཚོགས་གླིང་གི་ལས་ཁུངས་ནས་དྲང་བདེན་གྱི་ལས་ལ་བརྩོན་པའི་the Faith &Belief Forum ཚོགས་པ་འདིའི་དབུ་ཁྲིད་དང་། ཉམས་ཞིབ་པ། ལས་བྱེད་ཡོངས་ལ་སྙིང་ཐག་པ་ནས་ཐུགས་རྗེ་ཆེན་ཞུས་ཀྱིན་ཡོད།
རྒྱ་གར་སྐད་དུ། །སྦྱ་བ་སཾརྫ་ཀྲཱརྨསྤྲ། བོད་སྐད་དུ། སྲིད་པ་འཕོ་བ།
འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །
དངོས་པོ་མེད་པས་སྐྱེ་བ་མེད། །
དངོས་པོ་མེད་པ་དེ་ལ་ནི། །
སྐྱེ་བ་བླངས་པ་སྲིད་པ་ཡིན། །
རྟག་ཏུ་དངོས་པོ་ཡོད་བསམ་པ། །
དེ་ལྟར་བསམ་པ་འཁྲུལ་བ་ཡིན། །
ནམ་མཁའི་མེ་ཏོག་དང་འདྲ་བ། །
མཁའ་དང་མཉམ་པའི་ཆོས་ཉིད་ལ། །
དེ་ལ་སྐྱེས་པ་མཁའ་དང་མཉམ། །
རང་བཞིན་ཐམས་ཅད་མཁའ་དང་མཉམ། །
དེ་ལྟར་མཁས་པས་རྟོགས་པར་བྱ། །
རྒྱུ་མེད་འབྲས་བུ་མེད་པ་དང༌། །
ལས་ཀྱི་དངོས་པོ་མེད་པ་དང༌། །
དངོས་པོ་ཐམས་ཅད་འདི་ལྟར་མེད། །
འཇིག་རྟེན་འདི་དང་ཕ་རོལ་དང༌། །
སྐྱེ་བ་མེད་པའི་ངོ་བོ་ཉིད། །
དེ་ལས་གཞན་ནི་སྐྱེ་བར་བྱེད། །
མོ་གཤམ་བུ་ཡི་བུ་ལ་ཡང༌། །
དེ་ལ་སུ་ནི་སྐྱེ་བར་མཛོད། །
འཇིག་རྟེན་པ་འདི་སྔར་མ་སྐྱེས། །
དེ་ལས་སུས་ཀྱང་བྱས་པ་མེད། །
དོན་མེད་འཁོར་བའི་འཇིག་རྟེན་ན། །
སྒྱུ་མའི་གྲོང་ཁྱེར་འཁྱམས་པ་བཞིན། །
ཡོད་མེད་གང་ཡང་མིང་བསྟན་པ། །
ཆོས་ཉིད་ཀྱི་ལེའུ་སྟེ་དང་པོའོ། །
རྣམ་རྟོག་ལས་ནི་འཇིག་རྟེན་འབྱུང༌། །
རྣམ་རྟོག་དེ་ལས་སེམས་ཀྱང་འབྱུང༌། །
སེམས་ལས་ལུས་ཀྱང་བྱུང་བ་ན། །
ལུས་ལ་བརྟག་པར་གྱིས་ཙམ་ན། །
གཟུགས་དང་ཚོར་བ་མིང་དང་ནི། །
དངོས་པོ་སྟོང་ཉིད་མེད་པ་ཡིན། །
འདུ་བྱེད་དངོས་པོ་དེ་ཡང་མེད། །
སེམས་ཀྱིས་བརྟག་པ་གང་ཡང་མེད། །
སེམས་ནི་རྟོག་མེད་ངོ་བོ་ཡིན། །
ཕུང་པོ་ལྔ་སྟོང་པ་ཉིད་དུ་བསྟན་པའི་ལེའུ་སྟེ་གཉིས་པའོ། །
སེམས་མེད་པས་ན་ཆོས་ཀྱང་མེད། །
དེ་ལྟར་ལུས་དང་ཁམས་ཀྱང་མེད། །
དེ་ལྟར་གཉིས་མེད་ལམ་གྱི་ནི། །
དེ་ཉིད་དུ་ནི་རབ་ཏུ་བཤད། །
འདི་དག་ཐམས་ཅད་རྟེན་མེད་ཡིན། །
རྟེན་མེད་དུ་ནི་རབ་ཏུ་བཤད། །
བློ་ནི་རྟེན་མེད་གྱུར་ནས་ནི། །
དེ་ཡང་རྟེན་མེད་འབྱུང་བའོ། །
ཤེས་རབ་བསྟན་པའི་ལེའུ་སྟེ་གསུམ་པའོ། །
སྦྱིན་པ་ཚུལ་ཁྲིམས་བཟོད་པ་དང༌། །
བརྩོན་འགྲུས་བསམ་གཏན་ཤེས་རབ་སོགས། །
རྟག་ཏུ་དེ་བྱས་ལས་ཀྱིས་ནི། །
མྱུར་བའི་འདུས་སུ་བྱང་ཆུབ་ཐོབ། །
ཐབས་བསྟན་པའི་ལེའུ་སྟེ་བཞི་པའོ། །
ཐབས་དང་ཤེས་རབ་གནས་པ་ལ། །
དེ་ལས་སྐྱེ་བའི་བདུད་རྩི་ནི། །
བླ་མའི་བཀའ་ཡིས་ཟད་པ་མེད། །
མྱུར་བའི་དུས་ལ་རྙེད་ནས་ནི། །
ཐམས་ཅད་མཁྱེན་པ་ཐེ་ཚོམ་མེད། །
འདི་དག་ཐམས་ཅད་མིང་ཙམ་ཡིན། །
མིང་གི་ཁམས་སུ་རབ་ཏུ་གནས། །
བཤད་བྱེད་དེ་ཡང་གུད་དུ་ཡང༌། །
བཤད་བྱ་དེ་ཡང་གང་ན་ཡོད། །
གང་ལས་གང་བྱུང་མིང་དེ་ནི། །
གང་ལས་གང་བྱུང་ཆོས་དེ་རྣམས། །
དེ་ནི་མེད་པར་འགྲོ་བ་ཡིན། །
ཆོས་དེ་མེད་པས་ཆོས་ཉིད་ཡིན། །
མ་བྱུང་མིང་ནི་སྟོང་ཉིད་ཡིན། །
དེ་ཡང་མིང་དུ་གྲུབ་པ་མེད། །
ཆོས་རྣམས་ཐམས་ཅད་མིང་མེད་པ། །
མིང་མེད་དུ་ནི་ཤིན་ཏུ་གསལ། །
དེ་ལྟར་རྣམ་རྟོག་གང་བྱུང་བ། །
དེ་ཡང་སྟོང་ཉིད་རྣམ་རྟོག་ཡིན། །
མིག་གིས་མཐོང་བའི་གཟུགས་དེ་ནི། །
དེ་ཉིད་མཁྱེན་པས་ཡོད་པར་བཤད། །
བརྫུན་གྱི་ང་རྒྱལ་འཇིག་རྟེན་པ། །
ཀུན་རྫོབ་སེམས་པ་བརྟེན་པ་ཡིན།།
རྟེན་འབྲེལ་འཛོམ་པས་མཐོང་བ་གང༌། །
དེར་སྣང་སྟོན་པ་འདྲེན་པ་ཡིན། །
འཛིན་པ་སྤྱོད་པའི་ས་ཡོད་པར། །
དོན་དམ་པ་ཡི་བློ་མ་ཡིན། །
མིག་གིས་གཟུགས་ནི་མཐོང་མི་འགྱུར། །
སེམས་ཆོས་དེ་ཡང་ཡོད་མི་འགྱུར། །
གང་སྣང་ཐམས་ཅད་བརྫུན་དུ་བཤད། །
འཇིག་རྟེན་པས་ནི་གང་སྤངས་པ། །
དེ་ནི་དོན་དམ་ཡིན་པར་བཤད། །
བདེན་པ་གཉིས་བསྟན་པའི་ལེའུ་སྟེ་ལྔ་པའོ། །
དབུ་མ་སྲིད་པའི་འཕོ་བ་ཞེས་བྱ་བ་འཕགས་པ་ཀླུ་སྒྲུབ་ཀྱིས་མཛད་པ་རྫོགས་སོ།།།།