དུས་གསུམ་སངས་རྒྱས་འཕྲིན་ལས་མཛེས་པའི་སྐུ། །མ་འདྲེས་དྲུག་ཅུའི་སྙན་འཇེབས་ལྡན་པའི་གསུང། །
ལེགས་ཉེས་ཕྲ་རགས་རྗེན་པར་མཁྱེན་པའི་ཐུགས། །ཉོན་མོངས་དྲི་སེལ་སྒྲོལ་མར་གསོལ་བ་འདེབས། །
བཞིན་རས་ཉ་གང་ཟླ་བརྒྱ་བརྩིགས་འདྲའི་ངོས། །སྙིང་རྗེ་འཛུམ་མདངས་འོད་རླབས་འཕྲོས་པའི་ཚེ། །
གདུང་བའི་སྤྲིན་རུམ་ཆོས་ཉིད་མཁའ་ལ་ཡལ། །མཐོང་བར་ཀུན་སྨོན་སྒྲོལ་མར་གསོལ་བ་འདེབས། །
སྐལ་དམན་ངན་འགྲོར་ལྷུང་བའི་ལུས་ཅན་ལ། །བརྩེ་བའི་གཟིགས་པ་ནམ་ཡང་མི་འདོར་བར། །
བཤེས་གཉེན་སྤྲུལ་པ་སྣ་ཚོགས་སྟོན་མཛད་པའི། །ཐབས་མཁས་ཐུགས་རྗེ་སྒྲོལ་མར་གསོལ་བ་འདེབས། །
རིང་ནས་འཁོར་བར་ཉུལ་བའི་འགྲོ་བ་ལ། །འཇིགས་པ་བརྒྱད་ཀྱི་འཐོར་རླུང་དབྱིངས་སུ་དེད། །
ཕར་ཕྱིན་དྲུག་གི་འཇའ་ཟེར་ལམ་སྣ་དྲོངས། །འདི་ཕྱིའི་སྐྱབས་མཆོག་སྒྲོལ་མར་གསོལ་བ་འདེབས། །
ལྔ་བདོ་རྩོད་པའི་དུས་ཀྱི་མཐའ་ལ་བརྟེན། །རྐྱེན་ངན་སྣ་ཚོགས་འཕྲད་པར་མཐའ་མེད་ཀྱང་། །
བཤད་སྒྲུབ་བསྟན་པ་སྐྱོང་བར་གྲོགས་མཛད་མ། །འཕྲིན་ལས་ལྷ་མཆོག་སྒྲོལ་མར་གསོལ་བ་འདེབས། །
ཐོས་པའི་ཉམས་ལེན་རི་ཁྲོད་མ་འགྲིམས་པས། །གཉུག་མའི་སེམས་འདིས་བྱིང་རྒོད་ཞོན་བཞིན་དུ། །
བག་མེད་ཐང་ལ་ཉུལ་བར་ལྷག་པར་འགྱོད། །མ་གཅིག་རྗེ་བཙུན་སྒྲོལ་མར་གསོལ་བ་འདེབས། །
འདྲེན་མཆོག་སྐྱབས་གནས་ཀུན་ལས་ཆེས་ལྷག་པ། །སྐྱེ་དགུ་བདེ་བའི་མོས་པར་ཚིམ་མཛད་པའི། །
འདི་ཕྱིར་རེ་བལྟོས་ཞུ་ས་གཞན་མེད་པས། །རྗེ་བཙུན་སྒྲོལ་མས་ལམ་སྣ་འདྲེན་དུ་གསོལ། །
ཞེས་ལྷ་མཆོག་རྗེ་བཙུན་སྒྲོལ་མར་གསོལ་འདེབས་པད་དཀར་ཆུན་པོ་འདི་ནི། འགྲོ་མགོན་གངས་རི་ཀརྨའི་སྐྱེས་ཕྲེང་ཀུན་གྱི་གྲས་མཐར་ཆུད་པའི་བསྟན་འཛིན་ཀུན་དགའ་ཆོས་ཀྱི་རྒྱལ་མཚན་གྱིས་ཞི་བདེ་དཔལ་ཡོན་ཕྱུག་མོ་དབྱིན་ལེན་རྒྱལ་ཁབ་ཏུ་བྲིས་སོ། །