དུས་གསུམ་རྒྱལ་བའི་ཡུམ་མཆོག་བཅོམ་ལྡན་མ། །འཆི་མེད་ལྷ་མོའི་གཟུགས་ཀྱི་སྐུར་བཞེངས་པ། །
འཇིགས་རུང་འཁོར་བ་ལས་སྒྲོལ་ཏ་རེ་མས། །འཆི་མེད་ཚེ་ཡི་དངོས་གྲུབ་དེང་འདིར་སྩོལ། །
ངག་གི་དབང་པོའི་ཐུགས་བསྐྱེད་ལྷ་ལམ་ལས། །ཀུན་དགའི་རིང་ལུགས་པད་ཚལ་རྒྱས་མཛད་ཕྱིར། །
ཕྲིན་ལས་འོད་སྣང་བྱེ་བའི་འབྱུང་གནས་ཅན། །བཤེས་གཉེན་ཉིན་བྱེད་དབང་པོ་ཞབས་བརྟན་གསོལ། །
སྐུ་ཚེའི་འདུ་བྱེད་རྩ་བ་རབ་ཏུ་བརྟན། །ཐོས་བསམ་སྒོམ་པའི་ཡལ་འདབ་ཕྱོགས་བཅུར་རྒྱས། །
འཕྲིན་ལས་འབྲས་བུས་ལྕི་བའི་དཔག་བསམ་ཤིང་། །ཕྱོགས་རྣམ་ཀུན་ལས་རྣམ་པར་རྒྱལ་གྱུར་ཅིག །
དཀོན་མཆོག་རྣམ་གསུམ་བདེན་པའི་བྱིན་རླབས་དང་། །དམ་ཅན་ཆོས་སྐྱོང་སྲུང་མའི་མཐུ་རྩལ་སྟོབས། །
ཆོས་ཉིད་རྟེན་འབྱུང་ཟབ་མོའི་བདེན་མཐུ་ཡིས། །སྨོན་པའི་དོན་ཀུན་བདེ་བླག་འགྲུབ་གྱུར་ཅིག །
ཅེས་པ་འདི་ཡང་སྨར་ཁམས་གངས་རི་ཀརྨ་སྤྲུལ་སྐུའི་ཞབས་བརྟན་སྨོན་ཚིག་ཅིག་བྲིས་དགོས་ཞེས་དོན་གཉེན་ཅན་འགས་བསྐུལབ་ལྟར། ས་སྐྱ་༧་ཁྲི་འཛིན་སྒྲོལ་མ་ཕོ་བྲང་པ་ངག་དབང་ཀུན་དགས་བྲིས་པ་དོན་དང་ལྡན་པར་གྱུར་ཅིག །