ཨོཾ་སྭ་སྟི། །མཆོག་ཏུ་མི་འགྱུར་ཡེ་ཤེས་ཚེ་མཐར་ཡས། །རྣམ་མང་སྒྱུ་འཕྲུལ་འཕགས་མ་བི་ཛ་ཡ། །
རྒྱལ་ཀུན་ཡུམ་གྱུར་ཨྰརྱ་ཏྰ་རེ་མ། །རྣམ་གསུམ་འཆི་མེད་ཚེ་ལྷས་དགེ་ལེགས་སྩོལ། །
མི་ལ་ཡབ་སྲས་ཐུགས་རྗེའི་ཆུ་གཏེར་ལས། །ཕན་བདེའི་ཀུནྜ་རྒྱས་པའི་དཔལ་བལྟམས་པ། །
བསྟན་འཛིན་ཀུན་དགའ་བདུད་རྩིའི་འོད་དཀར་ཅན། །ལྔ་བདོའི་མུན་སེལ་སྒྲོན་མེར་གསོལ་བར་འདེབས། །
མཁྱེན་གཉིས་ཐུབ་བསྟན་ཟབ་ཞི་སྤྲོས་དང་བྲལ། །བདེ་སྟོང་ཆོས་དབྱིངས་མི་འགྱུར་རིག་པ་འཛིན། །
བདེན་གཉིས་དབྱངས་ཀྱི་ཡན་ལག་ཡོངས་རྫོགས་པས། །ཀུན་ཏུ་བཟང་པོ་ཐེགས་མཆོག་སེངྒེའི་སྒྲས། །
ལྟ་དམན་རི་དྭགས་ཟིལ་གནོན་དགའ་བ་འབུམ། །འགག་མེད་གསུང་དབྱངས་སྒྲོགས་བཞིན་རྟག་བརྟན་ཤོག །
ཚོགས་གཉིས་ཕུལ་བྱུང་ལང་ཚོའི་མཛེས་སྡུག་བཀྲ། །གསལ་རྫོགས་རྒྱལ་བའི་མཚན་དང་དཔེ་བྱེད་ཟླ། །
མཐོང་ན་མི་མཐུན་མེད་པའི་རབ་བརྗིད་སྐུ། །མི་འགྱུར་རྡོ་རྗེའི་ཁམས་སུ་འཚོ་བཞེས་གསོལ། །
གསན་བསམ་སྒོམ་པས་གོང་མའི་བསྟན་པ་འཛིན། །དུས་གསུམ་ཀུན་ཏུ་འཆད་རྩོད་རྩོམ་པས་འདའ། །
གདུལ་བྱའི་དགའ་སྟོན་སྤེལ་ལ་རྒྱལ་སྲས་བཞིན། །མཚུངས་མེད་མཚན་གྱིས་སྙན་དེ་ཞབས་བརྟན་ཤོག །
ངག་ལ་དབང་ཐོབ་ཤེས་བྱར་གཟིགས་པ་ཡངས། །འགྲོ་ཀུན་དགའ་སྟེར་དམིགས་མེད་སྙིང་རྗེའི་མཛོད། །
མཐུ་སྟོབས་ནུས་པའི་འབྱུང་གནས་འཕྲིན་ལས་ཅན། །མཁྱེན་ནུས་བརྩེ་བ་མངའ་ལྡན་ཞབས་བརྟན་གསོལ། །
མཁས་མང་མགུ་བའི་གཟུངས་སྤོབས་བློ་གྲོས་མཁར། །ཁྲིམས་འཆལ་འགོག་པའི་ཚུལ་ཁྲིམས་འོད་སྟོང་ལྡན། །
བཟང་པོའི་ཐུགས་བསྐྱེད་གདུལ་བྱའི་པདྨོའི་ཚལ། །འབྱེད་པའི་དེད་དཔོན་དམ་པ་ཞབས་བརྟན་ཤོག །
མང་ཐོས་ལུང་གི་འདབ་སྟོང་གྲོལ་བ་ལས། །རྟོགས་པའི་སྦྲང་རྩིའི་ཟིལ་མངར་རྟགས་འཇོ་བས། །
ཡིད་ཅན་རྣམ་གྲོལ་བདུད་རྩིའི་ངལ་འཚོལ་ལ། །སྦྱོར་བའི་བཤེས་གཉེན་རྨད་བྱུང་ཞབས་བརྟན་ཤོག །
དྲི་མེད་རྒྱལ་བསྟན་རིས་བྲལ་གངས་རིའི་སྤོར། །བཤད་སྒྲུབ་རྩལ་རྫོགས་གདོང་ལྔའི་དབང་པོ་ཁྱོད། །
མི་མཐུན་ཉེར་འཚོའི་དཔུང་གིས་མི་བརྫི་བར། །གཡོ་མེད་ཆོས་བདུན་རྗེས་འགྲོར་རྟག་བརྟན་ཤོག །
དགག་བཞག་དཔང་གསུམ་རིག་པའི་གར་སྟབས་ཀྱིས། །དྲང་ངེས་ཆོས་ཀྱི་རྒྱུད་མང་རབ་ཁྲོལ་བས། །
བློ་ལྡན་སྒྲ་འཛིན་འཇེབས་པའི་སྙན་བརྒྱུད་གླུས། །རྒྱལ་བསྟན་གསལ་བའི་བྱེད་པོ་རྟག་བཞུགས་གསོལ། །
མདོ་རྒྱུད་ལམ་གྱི་རིག་པའི་ཡིད་བཞིན་དབང་། །དཔྱད་འཇོག་བ་དན་ཐོད་དུ་རབ་བསྒྲེངས་ནས། །
དོན་གཉིས་དབྱིག་གི་སྦྲང་ཆར་འབེབས་མཁས་པ། །འགྲོ་བའི་བསོད་ནམས་ཉེར་འཚོར་རྟག་བརྟན་ཤོག །
གྲོང་ཁྱེར་གསུམ་གྱིས་ཡང་དག་མཛད་རླབས་གྱིས། །བྱང་ཆུང་གསུམ་ལ་འགོད་ཕྱིར་འཚོ་གཞེས་གསོལ། །
མདོར་ན་གང་གི་ཞབས་ཟུང་བཀྲ་ཤིས་ཀྱིས། །རེ་ཁྰ་མི་གཤེགས་གཡུང་དྲུང་ལེགས་བཀོད་དེ། །
བསྟན་འགྲོའི་འཕྲིན་ལས་འོད་སྣང་ཀུན་ཁྱབ་པའི། །བཀྲ་ཤིས་ཕྱོགས་ལས་རྣམ་པར་རྒྱལ་གྱུར་ཅིག །
དེ་ལྟར་མཆོག་གསུམ་བདེན་པའི་བྱིན་རླབས་དང་། །ཆོས་ཅན་ཆོས་ཉིད་བསླུ་མེད་བདེན་པའི་སྟོབས། །
བདག་གི་ལྷག་བསམ་དག་པའི་འདུན་སྨོན་གྱིས། །འདོད་དོན་ལྷུན་གྱིས་འགྲུབ་པའི་དཔལ་དུ་ཤོག །
ཅེས་པའང་བསྟན་དང་འགྲོ་བའི་མགོན་པོ་མཚུངས་ཟླ་མ་མཆིས་པ་གངས་རི་ཀརྨ་མཆོག་སྤྲུལ་བསྟན་འཛིན་ཀུན་དགའ་ཆོས་ཀྱི་རྒྱལ་མཚན་ནམ། མཚན་གཞན་ངག་དབང་ཀུན་དགའ་འབྱུང་གནས་རིན་པོ་ཆེའི་ཞབས་བརྟན་གསོལ་འདེབས་ཤིག་དགོས་ཞེས་དགེ་བཤེས་ངག་དབང་མཆོག་ལྡན་གང་གིས་གསུང་བསྐུལ་གནང་བ་དེ་བཞིན་རྫ་རོང་འཁྲུལ་ཞིག་ཞྭ་སྤྲུལ་དུ་འབོད་པའི་དགེ་སློང་ཝྰ་གིནྜ་དྷ་རྨ་མ་ཏིས་ཐ་སྐར་ཟླ་བའི་དཀར་ཕྱོགས་ཀྱི་དགའ་བ་གསུམ་པའི་ཉིན་སྨོན་པའི་མཚམས་སྦྱོར་དྲག་པོ་དང་བཅས་འདི་བཞིན་བྲིས་ཏེ་ཕུལ་བས་ན། མགོན་པོ་གང་གི་ཞབས་ཟུང་སྲིད་མཐར་བསྟན་ཅིང་། བསྟན་འགྲོར་སྨོན་པའི་བཞེད་དོན་ཡོངས་སུ་འགྲུབ་པའི་རྒྱུར་གྱུར་ཅིག །
